නවසීලන්තයේ වෙසෙන නිම්රේඛා කොලින්ස් මල් කර්මාන්තයේ යෙදෙන ශ්රී ලාංකික තරුණියකි. මල් පැල වගාවට කවදත් ඇළුම් කල ඇය ශ්රී ලංකාවේදී වයස අවුරුදු දහසයේදී පමණ තමන්ගේම කියන මල් පැල තවානකට හිමිකම් කියන්නටද වූවාය.
මෙම ක්ෂෙත්රයේ වසර දහයක පමණ කාලයක් කටයුතු කර ඇති ඇය මේ වනවිට ඇයගේ නැන්දනිය සමග එක්ව වෙලිංටන් නගරයේ ප්ලිමටන් ප්රදේශයේ මල් ව්යාපාරයක් පවත්වාගෙන යයි.
නිම්රේඛා පවසන ආකාරයට මෙය තම මනසට විශාල සහනයක් ගෙනදෙන කටයුත්තක් මෙන්ම හොඳ ආදායමක්ද ලැබිය හැකි ව්යාපාරයකි.
මල් ව්යාපාරය සම්බන්ධව ඇය විසින් ගෙන එන ලිපි පෙළක පළමුවැන්නයි මේ.
ශ්රී ලංකාව සමග සැසඳීමේදී, නවසීලන්තයේ මල් සහ කොළ වර්ග බොහොමයක් දැකිය හැකියි. එමෙන්ම ශ්රී ලංකාවේ සැරසිලි වලට මල් උපයෝගී කර ගන්නා අවස්ථා වලට වඩා නවසීලන්තයේ සැරසිලි සඳහා මල් යොදා ගන්නා අවස්ථාද අධිකය.
නවසීලන්තයේ වෙළඳපොළට වැඩිපුරම එකතු වෙන්නේ දේශීයව වගා කරන මල් වන අතර රෝස, ජර්බරා, ලිලී ඒවා අතරින් කිහිපයක්ය. නමුත් මීට අමතරව ඝර්ම කලාපීය රටවලින් ආනයනය කරන මල් වර්ගද තිබේ.
United Flower Growers යනු නවසීලන්තයේ සිටින ප්රධාන මල් අලෙවිකරුවෙකි. මොවුන් විසින් මල් තොග පවත්වාගෙන අතර වෙළෙඳපොළට අවශ්ය කරන මල් සුළු පරිමානයේ ව්යාපාරිකයන් හට වෙන්දේසි කරති.
මෙසේ වෙන්දේසියෙන් මිලදී ගන්නා ලද මල් තමන්ගේ ව්යාපාරික ස්ථානයට ගෙන ආ පසු පලමුව සිදුකරනුයේ මල් processing කිරීමයි. මෙහිදී සෑම මලකම නටුව කෝණයකට (angle) කපා ඉන්පසු එම මල් පිරිසිදු වතුර ඇති පෝච්චි වලට දමන අතර රෝස ලිලී වැනි මල් නම් ඒවා ශීතකරණයක තැන්පත් කරයි. ශීතකරණයක තබා ගත් විට මල් පිපීම ප්රමාද වේ.
මල් බඳුනකට මල් දැමීමට පෙර වතුරට ඡනෝලා බිංදුවක් එක් කර ගැනීමෙන් මල් වල ආයු කාලය වැඩි කර ගනීමට හැකියාව ලැබේ. ඒ වගේම මල් බඳුනේ වතුර දිනපතා මාරු කිරීමෙන්ද, ඒ මාරු කරන අවස්ථාවලදී හැම විටම පිරිසිදු වතුර දැමීමෙන්ද, ඒ වාගේම නටුවේ කෙළවරින් පොඩි කොටසක් කපා දැමිමෙන්ද මල් වල ආයු කාලය වැඩිකර ගැනීමට හැකිවේ.
මල් අලෙවි කරන ස්ථානයකින් ගන්නා මල් බොහෝ දුරට සුපිරිවෙළඳසළකින් හෝ ඉන්ධන පිරවුම්හලකින් ගන්නා මල් වලට වඩා කල් පවතින බවද අනිවාර්යයෙන්ම කිව යුතුය. එයට හේතුව වන්නේ මල් අලෙවි කරන ස්ථාන වල ඇති මල් වලට වඩා හොඳ සාත්තුවක් ලැබීමයි. මල් අලෙවිකරනා ස්ථාන වල මල් එම ස්ථානයට ගෙනා ආදා සිට පාරිභෝගිකයාගේ අතට යන තෙක් නිසි ක්රමවේදයක් යටතේ රැක බලාගැනීමක් සිදුවේ.
මීළඟ ලිපියෙන් මල් බඳුනක් සැකසීමේ දී සැලකිය යුතු කරුණු දැන ගමු.
නිම්රේඛා කොලින්ස්
Wellington