ඔක්තෝබර් මස 17 වෙනිදා පැවැත්වුණු නවසීලන්තයේ මහමැතිවරණයෙන් ජසින්ඩා ආර්ඩ්න් මහත්මිය නායකත්වය දරණ කම්කරු පක්ෂය ආසන 64ක් දිනාගෙන විශිෂ්ඨ ජයග්‍රහණයක් වාර්ථා කර ඇත.
මෙම ආසන සංඛ්‍යාව අනුව කම්කරු පක්ෂයට තනිවම ආණ්ඩුවක් පිහිටුවීමට හැකිවන අතර 1996 වසරේ හඳුන්වා දුන් මිශ්‍ර සමානුපාතික ඡන්ද ක්‍රමයෙන් පසු මෙසේ තනි ආණ්ඩුවක් පිහිටුවීමට පක්ෂයක් බලය ලබා ගත් පළමු අවස්ථාව මෙය වේ.
2017 වසරේ පැවැති මහමැතිවරණයෙන් ආසන 56ක් දිනාගත් ජාතික පක්ෂයට මෙවර හිමි වී ඇත්තේ ආසන 35ක් පමණි. ජාතික පක්ෂයේ නායිකා ජූඩිත් කොලින් මහත්මිය විසින් පරාජය පිළිගෙන ඇති අතර ඉදිරියේදී ශක්තිමත් විපක්ෂයක් ගොඩනගන බව ඇය පවසයි.
මේ අතර පසුගිය පාර්ලිමේන්තුවේ නියෝජ්‍ය අග්‍රාමාත්‍යධූරය දැරූ වින්ස්ටන් පීටර්ස් මහතා නායකත්වය දුන් නිව්සීලන්ඩ් ෆස්ට් පක්ෂයට කිසිදු ආසනයක් දිනා ගැනීමට නොහැකිවී ඇති අතර, ACT පක්ෂය සහ හරිත පක්ෂය ආසන 10 බැගින්ද මව්රි පක්ෂය එක් ආසනයක්ද දිනාගෙන ඇත.
