රාජකාරියේ ඉඩක් ලැබුණා
මාමා ළඟ මං ගිමන් නිව්වා
රට තොටේ වග කිමද ඇහුවා
මූණු පොතේ මා හැමතැනම කීවා…
මා නුවර ආ ගමන දැකලා
පෙළක් අය කැළඹිලා තිබුණා
ගිමන් හරිනට වෙලා නැතුවා
මාමේ මේ ටික ලියමු කීවා…
කොටන් ඇද මහ වෙහෙර තැනුවා
රණබිමේ අපි පෙරට උන්නා
මගුල් මඩුවේ ජයට ඇඳලා
හෙළයෝ සමගින් අපිත් හිටියා…
කැලෑවේ අපෙ වරිගෙ උන්නා
ඉඳලා හිටලා ගිහින් බැලුවා
මා ගැනත් තතු තතු ඔවූන් ඇසුවා
සැලකුමයි වැඩ ටික ම කිව්වා…
මෙහේ හරියට කන්න නැතුවා
කැලෑවත් දැන් නතුව යනවා
උඹ හොඳින් නම් සතුටු වෙනවා
කියා ආ පිට මාව එව්වා…
පෙරහැරේ අලි වැඩේ කෙරුවා
පෙළක් අලි මහ කොටන් ඇද්දා
මනු ලොවේ ඇති ප්‍රශ්න නැතුවා
මේවා පැවරුම් ලෙසම සිතුවා…
පිට රටත් මගේ උරුමේ කියලා
මූණු පොතේ මහා සටන දුටුවා
අස්පයෝ දැන් තරගෙ නිමවා
ගොසින්දො වනපෙතට සිතුණා…
ඉලක්කෙට වෙඩි තියල තිබුණා
කුරුලු පරපුර සටනේ නැතුවා
සිරිලකේ පෙර විරිත දැකලා
සූද්දො කුමකට කඳුළු සැලුවා…
මගේ අයිතිය මටම දීලා
නීල වන පෙත ඉතුරු කරලා
යුතුකමක් උරුමයක් හිතලා
හිට ගනින් හෙළ පුතෙක් විලසා…
විවේකය දැන් නිමා වෙනවා
මාමටත් දැන් වෙහෙස ඇතුවා
සසර අපේ නිම වෙන්න සිතලා
මෙවර දළදා සමිදු වැන්දා…..
තමන් කළ හැකි දෙයක් නොසිතා
අයිතියක් ගැන වටේ දුවලා
යුතුකමක් උරුමයක් නො සිතා
එලව යන්න ද ඉන්නේ උඹලා…..
