හුස්ම ඉහළට ආයේ පහළට
නැවත ඉහළට නැවත පහළට
මිනිහ මැරිලා වසර පිරෙනවා
බණක් සමගින් දානේ වේලක්
රන්බණ්ඩා බැඳගන්න තිබුණනෙ
ඒකා තාමත් යසට ඉන්නවා
හුස්ම ඉහළට ආයේ පහළට
නැවත ඉහළට නැවත පහළට

එළදෙනගෙ කුළුඳුල්ම පැටියා
කඩාගෙනවිත් උරනවද කිරි
විසිපහයි ලීටරයක්ම දැන්
දෙකක් බිව්වොත් පනහ පනිනවා
හුස්ම ඉහළට ආයේ පහළට
නැවත ඉහළට නැවත පහළට

වත්ත හැමතැන පොලුත් වැටෙනවා
දෙළුම් කඩනවා රිලව් පනිනවා
කොන්ත්‍රාත් එක අරන් වාගෙ
ඇන්ටනා ටික රැගෙන දුවනවා
හුස්ම ඉහළට ආයේ පහළට
නැවත ඉහළට නැවත පහළට

උපාසක දානයේ හොද්දට
වැටුනනම් තව බිලිං අහුරක්
සෝයා මීටුයි පරිප්පුයි ටික
එනවා දැන්නම් උගුර ළඟටම
හුස්ම ඉහළට ආයේ පහළට
නැවත ඉහළට නැවත පහළට

රූං රූං ගාන සද්දෙ
හුස්ම එක්ක පිටවෙනවා
දොස්තරලත් ගිනි ගාණක්
පස්පංගුවෙ පිහිට තමයි
හුස්ම ඉහළට ආයේ පහළට
නැවත ඉහළට නැවත පහළට

පින්වතුනි දැන් නවත්වමු අපි
ගිලන්පස ටික ළග එනවා ඇති
මෙහෙම වෙර වීරියෙන් වැඩුවේ
භාවනාවයි “ආනාපානසති”

‭සාගර වික්‍රමසිංහ – රන්ගිඕරා‬