ඕක්ලන්ඩ් එක්සත් ශ්රී ලංකා සංගමය.
UNITED SRI LANKA ASSOCIATION
වසර තිහකට පෙර ආරම්භකරන ලදුව, 1998 දී සංස්ථාපනය කරනු ලැබූ ඕක්ලන්ඩ්, එක්සත් ශ්රී ලංකා සංගමය, පරමාර්ථ කිහිපයක් උදෙසා ස්ථාපිත කරන ලද, ශ්රී ලාංකික සාමාජිකයන්ගෙන් සැදුම්ලත් සමාජ සංවිධානයකි. එහි පරමාර්ථ වන්නේ;
- සියලුම ශ්රී ලාංකිකයන් අතර සුහදතාවය සහ සමගිය ප්රවර්ධනය කිරීම.
- ශ්රී ලංකාව සියලුම මිනිසුන්ට සමාන අයිතිවාසිකම් ඇති, සාමයෙන් සහ සමගියෙන් ජීවත්විය හැකි, ස්වාධීන ස්වෛරී රාජයයක් ලෙස තහවුරු කිරීම සහ ප්රවර්ධනය කිරීම.
- එහි සාමාජිකයින්ගේ අවශ්යතා සහ සුභසාධනය ප්රවර්ධනය කිරීම.
- සාමාජිකයින්ගේ නවසීලන්ත ජීවන රටාවට නැඹුරු වීමට උපකාර කිරීම.
- සාමාජිකයන් අතර සමාජ, සංස්කෘතික සහ ක්රීඩා ක්රියාකාරකම් ප්රවර්ධනය කිරීම.
මෙකී පරමාර්ථයන් ඉටුකර ගැනීම සඳහා සංගමය මගින් විවිධ වැඩසටහන් ක්රියාත්මක කෙරේ. ශ්රී ලාංකික සංස්කෘතිය ඔප්නංවන වැඩසටහන්, නවසීලන්තයේ සිටින විවිධ කුසලතාවයන් සහිත බාල තරුණ වැඩිහිටි සියලු දෙනාට තම හැකියාවන් ඉදිරිපත් කිරීම සඳහා අවස්ථාව ලබාදෙන වැඩසටහන් සහ සාමාජිකයන්ගේ සුහදතාවය වර්ධනය කරන වැඩසටහන් එහි මුල්තැන ගනී.
එසේම ශ්රී ලංකාවේ වසන අප සහෝදර ජනතාවට විවිධ ආකාරපේ උපකාර ලබාදීමට ව්යාපෘති ක්රියාත්මක කිරීම වසර පුරා දියත් කෙරේ. සංගමය නිතරම උත්සාහ කරන්නේ ශ්රී ලංකාවේ දුෂ්කර පුදේශවල ජීවත්වන, විවිධ අවශ්යතා සහිත පිරිස් තෝරාගෙන ඔවුනට උපකාර ලබා දීමටයි. මේ ක්රියාකාරකම් තවදුරටත් ඉදිරියට ගෙන යමින් 2023 වසරේ පත් වූ නව නිලධාරි මණ්ඩලය “USLA Helpline” නමින් විශේෂ ව්යාපෘති වලට අවශ්ය උපදෙස් සහ මග පෙන්වීම් නොමිලයේ ලබාදීමට කටයුතු කෙරේ. උපදෙස් හා පහසුම් අවශ්ය අයත් එවැනි උපදෙස් හා මග පෙන්වීම් ලබාදිය හැකි, විශේෂඥ දැනුම ඇති අයත් මුණගැස්වීම මේ ව්යාපෘතියෙන් සිදු කෙරේ.
සංගමයේ සියලු වැඩසටහන් පිළිබද විස්තර www.uslaauckland.net.nz වෙබ් අඩවියේ සහ uslaaucklandnz ෆේස්බුක් පිටුවේ පළකර ඇත.
By Krishan Gallage – Auckland