Pukekohe ශ්‍රී ලාංකික ප්‍රජාව විසින් සංවිධානය කරන ලද, ‘ශ්‍රී ලාංකික සංස්කෘතික සැඳෑ’ සහ ‘ශ්‍රී ලංකාව වෙනුවෙන් ආධාර එකතු කිරීමේ වැඩසටහන’ පසුගියදා පුකේකොහේ හීදී පැවැත්විණි. මේ සඳහා ප්‍රධාන අනුග්‍රහය Arasan Trust විසින් ලබාදුන් අතර පුකෙකොහේ ශ්‍රී ලාංකික ප්‍රජාවගේ නොමසුරු ශ්‍රම දායකත්වයෙන් සැඳෑව සාර්ථක වීය.
වැඩසටහනේ ප්‍රධාන සංවිධායක ෂාර්මෙලා පොන්නම්බලම් මහත්මිය අප හා වචන කිහිපයක් බෙදා ගත්තාය.
‘මේ වැඩසටහනේ ප්‍රධාන අරමුණ වූයේ කොවිඩ් වසංගතය නිසා හුදකලා වූ කුඩා ශ්‍රී ලාංකික කණ්ඩායම්වලට සහයෝගය ලබා දීමේ ප්‍රයත්නයක් ලෙසටය. ඒ නිසාම අපි පුකෙකොහේ වැනි නගරයෙන් එපිට කුඩා නගරයක් තෝරා ගත්තේ එහි වසන ශ්‍රී ලාංකික ජනතාවට නැවත එකතු වීමට අවස්ථාවක් සලසා දීමටය. මේ සඳහා සිංහල, දමිල හා මුස්ලිම් ප්‍රජාවන් එකාවන්ව සහභාගී වී ඉදිරිපත් කිරීම් සිදුකිරීම වැඩසටහනේ සාර්ථකවයට මනා පිටිවහලක් වීය. ඒ වගේම අප මේ වැඩසටහන හා සමඟාමීව ලංකාව වෙනුවෙන් වෛද්‍ය ආධාර ලබා දීමට අරමුදල් එකතු කිරීමේ වැඩපිළිවෙලවක් ද සංවිධානය කරනු ලැබුවා. ඒ අනුව අප $1600.00 මුදලක් කොත්තු, ආප්ප, තෝසේ විකිනීමෙන් රැස් රැස් කළා.
ඒ වගේම වැඩසටහන සාර්ථකව කර ගැනීමට සහය වූ Arasan Trust හි සභාපති Dr. ලක්ස් සෙල්වනෙසෙන්, භාණ්ඩාගාරික කිශෝර් කුමාරසාමි මහතාට හා නන් අයුරින් සහය වූ පුකෙකොහේ ප්‍රජාවට ස්තුතිය වෙනවා.
