ශ්‍රි ලංකන් ගුවන් සේවය ආරම්භ කළ දා සිටම ගුවන් නියමුවෙකු ලෙස සේවයට බැඳුණු උත්පල කුමාරසිංහ මහතා පසුගිය මාර්තු 31 වන දින තම අවසන් ගුවන් මෙහෙයුම සිදු කළේය. ජ්‍යෙෂ්ඨ ගුවන් නියමු උත්පල කුමාරසිංහ මහතා තම දශක හතරක සේවා කාලය අවසන් කළේ ඉන්දියාවේ මදුරාසියේ සිට කටුනායක ගුවන් තොටුපොළට ළඟා UL 138 ගුවන් ගමනත් සමඟයි. ඒ මහතාගේ අවසන් ගුවන් ගමන වෙනුවෙන් විශේෂ හරසරයක් ලෙසින් කටුනායක ජත්‍යන්තර ගුවන්තොටුපළේ දී චාරිත්‍රානුකූලව ගුවන් ජල ආචාරයක් සිදු කළේය.
කුමාරසිංහ මහතාගේ අවසන් ගුවන් ගමන සඳහා සහාය ගුවන් නියමුවරයා ලෙස කටයුතු කළේ ඔහුගේ පුත් රහල් කුමාරසිංහ මහතා වීමද සුවිශේෂී වූ සිදුවීමකි.
රත්මලාන ගුවන් තොටුපලින් තම පුහුණු වීම් ආරම්භ කළ උත්පල කුමාරසිංහ මහතා 1979 දී ශ්‍රී ලංකන් ගුවන් සමාගමට ගුවන් නියමුවෙකු ලෙසින් සේවයට බැඳුණේය. 1991දී කපිතාන්වරයකු ලෙස තනතුරෙන් උසස්වීමක් ලද ඔහු විශ්‍රාම ලබන තෙක්ම එම තනතුරේ කටයුතු නොපිරිහෙලා ඉටු කළ කීර්තිමත් පුද්ගලයෙකි. ඔහු තම රැකියා දිවියට ආයුබෝවන් කියන්නේ ශ්‍රී ලංකන් ගුවන් සේවයේ සිටි ජ්‍යෙෂ්ඨතම ගුවන් නියමුවරයා ලෙසින්ය.
වසර හතළිහක් පුරා මව් රටේ අභිමානය සුරකිමින් ඔබ කළ සේවයට අපගේ උත්තමාචාරය
දිමුතු විජේසූරිය
Dimuthu Wijesooriya
