ගේබ්‍රියල් සුළි කුණාටුව සමග නවසීලන්තයේ ජාතික හදිසි තත්ත්වයක්

නවසීලන්තයට ගේබ්‍රියල් සුළි කුණාටුව ඇතුළු වීමත් සමග රට පුරා ජාතික  හදිසි තත්ත්වයක් ප්‍රකාශයට පත් කර ඇත.  නවසීලන්තයේ උතුරු දිවයිනේ   Auckland, Northland, Coromandel, Bay of plenty, Gisborne, Opotiki, Waikato, Hauraki, Whakatane සහ Hawke’s Bay ප්‍රදේශ ඉන් විශේෂ වේ.

අද දිනයේ දී ඕක්ලන්ඩ් නගරයට සුළඟින් දැඩි හානි සිදු විය හැකි බවට අනාවැකි පළකර ඇත. මේ විටත් උතුරු ප්‍රදේශයේ නිවාස දහස් ගණනක විදුලිය විසන්ධි වී ඇත. එමෙන්ම හානිදායක ප්‍රදේශවලින් මහජනතාව ඉවත් කිරීම් ද  සිදු කරමින් පවතී.

පෙර නොවූ විරූ ස්වාභාවික ව්‍යසනයක් ලෙස නිලධාරීන් මෙම තත්ත්වය විස්තර කර ඇත.ගං වතුර, නායයෑම්, නිවාස සහ දේපළ විනාශ කරමින් හමා යන ගේබ්‍රියල් සුළි කුණාටුව රට පුරා අඛණ්ඩවම පහර  දෙන බැවින් නවසීලන්ත රජය “ජාතික හදිසි තත්ත්වයක්” ප්‍රකාශ කර ඇත. නවසීලන්ත ඉතිහාසයේ “ජාතික හදිසි තත්ත්වයක්” ප්‍රකාශයට පත් කළ තුන්වන අවස්ථාව මෙයයි.

සුළි කුණාටුව Tararua කඳු ප්‍රදේශයට සහ වෙලින්ටන් දෙසට ගමන් කරමින් පවතින අතර Tararua ප්‍රදේශයට මිලිමීටර් 120 – 180ක වර්ෂාපතනයක් අපේක්ෂා කෙරේ.

දිමුතු විජේසූරිය